"الجاز" في اللامبورجيني!

عمرك دخلت في علاقة مع حد وحسيت انه مش بيسمعلك ولو سمع مش بيفهم ولو فهم بيعمل تماما عكس ما انت عايزه يعاملك ! ،علاقة زي دي احتمالية الانفصال فيها والفشل مؤكدة ..مش كدا؟

بس ايه رأيك لو الشريك دا كمان مينفعش تنفصل عنه ابدا ، مينفعش تستبدله ولا تاخد منه أجازة، يبقا مفيش حل غير انك تحسن علاقتك معاه، اصل مفيش مهرب!

دا بالضبط ملخص علاقتنا بجسمنا وبحالتنا النفسية! علاقتنا بجسمنا هي الزواج الذي ندخله بلا اختيار ،ولا سبيل للخروج منه الا بخروج الروح.

وزي ما بنعالج علاقتنا العاطفية بتجاهل اصل المشكلة والتركيز على الأمور السطحية ، تعالى شوف لما بنشعر بالتوتر أو الإكتئاب ، بنهمل ايه !بناخد حبايه تهدينا ، احنا بنعالج الأعراض لكن مش بنعالج السبب ، بنعالج الألم الناتج عن حاجات كتير ، لكن مش بنعالج الحاجات دي!

المسكن احيانا بيكون ضروري عشان تدي فرصة لجهازك العصبي يستريح ، وساعتها يقدر يدور على السبب الأساسي ، ولكن للأسف معظمنا لما بيرتاح مع المسكن بيستمر عليه ، وبيعتبر ان هو دا العلاج ، وبمجرد ما الجسم يتعود على المسكن بيعود الألم أشد من الأول.

طب السبب لتغيير حالتك النفسية ببساطة وبمنتهي السهولة ، لأما خارجي من ظروف محيطة ، أو داخلي من أفكارنا الداخلية والأكل اللي بناكله.

فكر ان عقلك دا موتور داير على طول ، أغلى موتور في العالم ، بيشغل اجهزة جسمك كلها ...تنفسك، ضربات قلبك ، حواسك كلها ، بيحلل المعلومات وينظم الأفكار ، بينظم حركة جسمك مع أفكارك ، بينظم الخلايا الدفاعية وخطة الدفاع ضد اي هجوم فيروسي او بكتيري ، مخك بيشتغل حتى وانت نايم ، بيحلملك وبالألوان كمان فوق شغله الأساسي.

فلو قلنا ان كفاءة أي شركة ، أو قدرة أي سفينة على الوصول بسلام يتوقف على القيادة ، "المخ النضيف" مش عبارة والسلام ، دا حقيقي جداا ، نضافة المخ بتيجي من نضافة الاكل اللي بناكله ، والنضافة هنا مش قصدي بيها غسلينها كام مرة ، ولكن محتويات الأكل ايه ، هل لو عندك عربية غالية جداا هتحط لها جاز ولا أنضف نوع بنزين ؟

أحد أسباب الضغط النفسي الداخلية تراكم الشوارد الحرة ونقص الفيتامينات الهامة والمعادن في الجسم، تماما زي ما الضرر اللي بيحصل لأي موتور لو استخدمت بنزين مخلوط أو رديء ( ماذا يحدث للامبورجيني لما نحط لها جاز ..يا قلبك ..يا جبايرك :) )

دراسات كتير اثبتت العلاقة بين السكر ، والأكل المليان كربوهيدرات : زي البيتزا والعيش الفينو والمعجنات والمكرونة ،والزيوت الضارة: زي كل زيت القلي ماعدا جوز الهند وزيت الزيتون ، وحالة الانسان النفسية والمزاجية ، فمثلا أي اكل بيأثر عل استقرار نسبة السكر في الدم ، بيخلي عندنا فقدان ذاكرة واحساس ان مخنا ضبابي ومش مركز "Brain Fog" ،ودا لما سكر الدم بيعلى ، أما بقا لما هوبا ينزل بسرعة ،بنحس بالتوتر وشد عصبي ومش مرتاح ومكتئب وتغضب لأقل سبب.

أنا كنت بحس بالتفكير الضبابي دا وعدم التركيز ومجرد تغير وجبة الفطار من (عيش او كورن فليكس ) ل (بيض أوجبنة أو شريحة سلمون وسلطة او سبانخ (بروتين وخضار ودهون صحية ) لاحظت تركيزي زاد وذاكرتي اتحسنت، البروتين في الفطار بيظبط سكر الدم اليوم كله.

ومع تكرار " الجاز" على المدى الطويل ، بيتحول مخك لقائد فاشل في اداء وظيفته نتيجة للخلل اللي بيحصل في الخلايا ، وتبدأ تشوف اعراض غريبة على جسمك ، بنسميها أعراض نفسجسمية.

من الأخر كدا بنلاقي الأكل بيأثر على :

1) البكتريا النافعة اللي بتساعدنا في الهضم وامتصاص العناصر من الأكل، اسمها الماكربيوتك

2) بيغير من تركيبه كيميا المخ وبالتالي كل خلية في جسمنا بتاخد أومرها من قائد خربان.

3) بيأثر على قدرة الجسم على التخلص من الشوارد الحرة (لو هنعتبر الخلية كائن حي بيأكل و ينمو ويتكاثر ويمرض ويموت ، فالشوارد دي نعتبره "البي بي" بتاع الخلايا) ، وبالتالي لما يتراكم في الجسم يسبب التهابات ويدمر الخلايا.


زمان كانوا بيقولوا " تفاحة في اليوم تبعد عنك الدكتور" ، ولكن دا كان في سنة 1956 ، انهارده انت محتاج 6 تفاحات في اليوم عشان تبعد عنك الدكتور ، مش عشان الدكتور رخم ومش عايز يمشي ، لكن عشان العناصر الغذائية في التربة تناقصت جدااا في الخمسين السنة اللي الفاتت ، جرفنا التربة وبنينا بيوت وقصادها بنهد جسمنا وصحتنا، هي الدنيا كدا مفيش حاجة مجانا ، كله بندفع تمنه!

احنا محتاجين نركز ناكل بشكل واعي اكتر ، ندخل لعقلنا انضف عناصر تخليه يشتغل مش بس صح لكن بأعلى كفاءة .أهم عناصر تركز عليها في " بنزينك" اليومي:

اولا: البوتاسيوم

الأخ بوتاسيوم من أهم العناصر اللي محتاجيناها ...ليه بقا؟ عشان الأخ بوتاسيوم دا المسئول عن الإسترخاء في الجسم ، دا اللي بيعمل مساج للجهاز العصبي ، فيحسسك بالراحة ويهدي أعصابك ، بيهدي نبضات قلبك ، عادة لو متوتر بتلاقي نبضات قلبك سريعة ونفسك ضيق، واحيانا تبقا نايم سامع ضربات قلبك ..ايوااا هو الأخ بوتاسيوم اللي حارم نفسك منه، دا غير انه بيظبط سكر الدم فمينزلش مرة واحدة ، وايه اللي بيحصل لما سكر الدم يقع ، تحس بالهبوط والخمول وتزيد رغبة الجوع جداا (الناس اللي جعانه على طول ..هه) ، الناس عادة بتاكل موزة في اليوم عشان البوتاسيوم ، ودي فيها حوالي 400 مللجم ، لكن احنا محتاجين على الأقل على الأقل 4700 مللجم ، ودا بيعادل من 8 ل 10 كوبايات من الخضار أو السلطة يوميا عشان بس تاخد الحد الأدنى اللي انت محتاجه.

قلت لي بتاكل قد ايه خضار في اليوم بقا؟...بتقول مفيش ...اتاريك ماشي اعصابك مشدودة ومتنشن ومتوتر ومش مستحمل كلمة!


ثانيا: فيتامين ب

لما نكون تحت ضغط جسدي ومرهقين جسمنا بيستخدم مخزون فيتامين ب ، ولما بنستهلكه كله الجسم بيبتدي توتره بيزيد ويجيلنا احساس بعدم الراحة مهما حاولنا نرتاح ... تحس ان جسمك متشنج ، تشنج في رجلك مثلا ، احساس بالاضطراب كدا متبقاش عارف سببه!.. اول حاجة تفكر فيها هي فيتامين ب.

احسن مصدر لفيتامين ب هو الخميرة ، معلقة خميرة جافة على كوباية زبادي.

هيريح عضلاتك وكمان بيساعدك تنام كويس لان جسمك بيكون مرتاح وبيمنع الكوابيس الناتجة من الضغط النفسي.


ثالثا: الكالسيوم

الكالسيوم زي فيتامين ب بيساعد جسمك يهدى ويسترخي وتحت الضغط الجسم بيستهلك مخزونه ..نلاقيه في ....جبنة ، زبادي ، بيض


رابعا: أوميجا 3

مهم جداا في عملية الإدراك والتفكير خصوصا في الأطفال ، مهم لو هتاخده كمكمل غذائي نستخدم نوعيات عالية الجودة .


خامسا: الإيودين

وخصوصا للسيدات الحوامل عشان نقصه بيسبب انجاب أطفال عندها تخلف عقلي ، دا اهم عنصر محتاجاه الغدة الدرقية ( الناس اللي بتعاني من بطئ الحرق نتيجة خمول الغدة الدرقية تركز في الحته دي)

المأكولات البحرية ، عشب البحر ، ملح الطعام (معلقة صغ

يرة في اليوم كافية ) أو بيدخل الجسم عن طريق تنفس الهواء قرب البحر.


أهم حاجة اننا محتاجين العناصر دي من الأكل مش من كبسولة لان ربنا خلق اجهزنا بالشكل دا ودا افضل طريقة تاخد بيها العناصر المهمة ، المكملات الغذائية متتخدش بدون تحليل ولا اشراف دكتور ، مهم التركيز تاخد احتياجات جسمك من الاكل ، فمهم تكون واعي لأكلك ومحتاج تعدله ازاي، مهم تسمع لجسمك وتفهم عايز يقولك ايه وتستجيب!



28 views0 comments